სპორტული ტანსაცმლის გიგანტმა adidas-მა მანჩესტერში დაარსებულ ქუჩის სტილის ბრენდ Drama Call-თან ითანამშრომლა, რათა წარმოადგინოს „მანჩესტერ იუნაიტედის“ ნოსტალგიური კოლექცია, რომელიც კლუბის 1991 წლის თასების მფლობელთა თასის ტრიუმფით არის შთაგონებული. კოლექციის ცენტრალური ნაწილია 91 წლის ფინალის მაისურის განახლებული ვერსია – დიზაინი, რომელიც სამუდამოდ არის ჩაწერილი „იუნაიტედის“ ისტორიაში. ეს განახლებული მაისური გრძელმკლავიანი თეთრი ფუძით არის წარმოდგენილი, რომელსაც ამშვენებს წითელი სამი ზოლი, adidas-ის სამყურა (Trefoil) და კლუბის გერბი, Drama Call-მა კი საკუთარი ხელწერა სტილიზებული ვარსკვლავის ლოგოს მეშვეობით დაამატა. ის გამოსახულია სახელოზე ტურნირის ლოგოს ნაცვლად, საყელოებსა და მანჟეტებზე, ასევე, როგორც მკრთალი, დიდი ზომის მოტივი წინა მხარეს. მაისურის გარდა, კოლექცია ცხოვრების სტილის სეგმენტშიც ფართოვდება. ნახევრად ელვაშეკრული სპორტული კოსტიუმები, ჰუდები, მაისურები, ქუდები და თუნდაც ფეხბურთის ბურთი – ყველა აერთიანებს adidas-ის მემკვიდრეობას, „იუნაიტედის“ იდენტობას და Drama Call-ის თამამ გრაფიკას. კლუბის ტრადიციის ქუჩის სტილის ესთეტიკასთან შერწყმა ქმნის კოლექციას, რომელიც თანაბრად კომფორტულად იგრძნობა როგორც სტადიონის ტრიბუნებზე, ისე ქუჩაში. „იუნაიტედის“ ფეხბურთელებმა თავად წარმოაჩინეს ახალი ფორმა „ოლდ ტრაფორდზე“ მისვლისას, „ბარნლისთან“ 3-2 მოგებამდე, რითაც კოლექციას პირველი საჯარო ჩვენება მოუწყვეს. და მიუხედავად იმისა, რომ 1991 წლის ფინალში „ბარსელონასთან“ 2-1 მოგებულ მატჩში გმირი მარკ ჰიუზი იყო, რომელმაც ორივე გოლი გაიტანა, „ბარნლისთან“ ბრუნო ფერნანდეშმა ითავა პასუხისმგებლობა – დამატებით დროში პენალტი ზუსტად შეასრულა და „იუნაიტედს“ კიდევ ერთი დრამატული გამარჯვება მოუპოვა. იქნება ეს ევროპაში სამ ათეულ წელზე მეტი ხნის წინ, თუ დღეს პრემიერ ლიგაში, მაისურს, როგორც ჩანს, წარმატება მოაქვს. შესაძლოა, „იუნაიტედმა“ მისი უფრო ხშირად ტარება დაიწყოს.