ამერიკელმა მილიარდერმა ლეონ კუპერმანმა „მანჩესტერ იუნაიტედში“ საკუთარი ინვესტიცია გააღრმავა, ამის შესახებ ახალი ანგარიში იუწყება. რუბენ ამორიმის მმართველობის 14-თვიანი რთული პერიოდის შემდეგ, „იუნაიტედი“, როგორც ჩანს, საბოლოოდ უბრუნდება სწორ გზას, დროებითი მთავარი მწვრთნელის, მაიკლ კერიკის ხელმძღვანელობით. „იუნაიტედმა“ ამორიმი გასული წლის დეკემბერში გაათავისუფლა, რითაც დასრულდა მღელვარე პერიოდი, რომელიც გამოირჩეოდა მისი ტაქტიკური წყობისადმი მკაცრი ერთგულებით, ფეხბურთელებთან უთანხმოებით და არათანმიმდევრული თამაშითა და შედეგებით. ბოლო წვეთი მისი საჯარო გამონათქვამები იყო, რომლებშიც ის, როგორც ჩანდა, კლუბის ხელმძღვანელობას უპირისპირდებოდა. თავის ბოლო პრესკონფერენციაზე, „ლიდსთან“ „ელანდ როუდზე“ ფრედ 1-1 დასრულებული მატჩის შემდეგ, ამორიმი ამტკიცებდა, რომ ის „იუნაიტედში“ მწვრთნელად და არა მთავარ მწვრთნელად მოვიდა. მან ასევე მკაფიოდ მიანიშნა ფეხბურთის დირექტორ ჯეისონ უილკოქსთან ურთიერთობაში არსებულ ბზარებზე. კერიკმა „ოლდ ტრაფორდზე“ წარმატებით დაიწყო მუშაობა, მისი ხელმძღვანელობით ჩატარებული ხუთი მატჩიდან ოთხი მოიგო და ერთი ფრედ დაასრულა. უმოკლეს დროში მან დანერგა შემტევი და აგრესიული თამაშის სტილი, რამაც გულშემატკივრები გაააქტიურა. ამჟამად, „წითელი ეშმაკები“ პრემიერ ლიგის ცხრილში მეოთხე ადგილზე არიან და მყარად ინარჩუნებენ ჩემპიონთა ლიგის საგზურის მოპოვების შანსს. აქამდე ყველა ყურადღება მოედანზე მიმდინარე მოვლენებზე იყო გადატანილი, ახლა კი ახალი ამბები მოედნის მიღმაც გვაქვს. „ინდეფენდენტის“ ცნობით, ამერიკელმა მილიარდერმა ლეონ კუპერმანმა „იუნაიტედში“ წილი გაზარდა. როგორც ცნობილია, კუპერმანი ახლა კლუბის A კლასის აქციების 5.2 პროცენტს ფლობს, რომელთა ღირებულებაც 50 მილიონ დოლარს აღემატება. გაზეთი დასძენს: „კუპერმანი არის „ომეგა ედვაიზორსის“ დამფუძნებელი, ნიუ-იორკში დაფუძნებული საინვესტიციო ფირმის. არ არსებობს ინფორმაცია, რომ ის „იუნაიტედის“ ხელში ჩაგდებას გეგმავს.“ „კუპერმანის მიერ ახლახან შეძენილი აქციები არ იქნა ნაყიდი რეტკლიფისგან ან გლეიზერების ოჯახისგან, არამედ ბრიტანულმა საინვესტიციო ფირმამ, „ლინდსელ ტრეინმა“, შეამცირა თავისი წილი „იუნაიტედში“. რეტკლიფი და გლეიზერების ოჯახი ფლობენ B კლასის აქციების უმეტესობას, რომლებსაც აქვთ შეწონილი ხმის უფლება – 10 ხმა თითო აქციაზე, A კლასის სტანდარტული აქციების ერთი ხმისგან განსხვავებით.