ალვარო არბელოამ ვინიციუს ჟუნიორს „მსოფლიოს ერთ-ერთი საუკეთესო“ უწოდა მას შემდეგ, რაც ბრაზილიელმა ორი პენალტი გაიტანა „რეალის“ „რეალ სოსიედადთან“ 4:1 მოგებულ მატჩში. თავდამსხმელი სანტიაგო ბერნაბეუზე შესვენებამდე და შესვენების შემდეგ ჯონ არამბურუმ წააქცია. მან წყნარად შეასრულა პენალტები ალექს რემირო კარისკენ, რითაც „ბლანკოსმა“ სამი ქულა მოიპოვა და ლა ლიგის ცხრილში „ბარსელონას“ გადაუსწრო. მატჩის შემდგომ პრესკონფერენციაზე არბელოამ ვრცლად ისაუბრა იმაზე, თუ რა მოაქვს ვინიციუს ჟუნიორს მადრიდის „რეალისთვის“. „მე უკვე ერთი თვეა, დიდებულ ვინიციუს ჟუნიორს ვხედავ,“ - განაცხადა 43 წლის მწვრთნელმა, „არა მხოლოდ ამ მატჩში. „ის ძალიან მაღალ დონეზე თამაშობს ჩემი მოსვლის დღიდან, არის გადამწყვეტი – დღესაც – და გააქვს გოლები, ასევე აკეთებს საგოლე პასებს სხვა დღეებში. „ის არის ფეხბურთელი, რომელიც რიცხვებს სცილდება, რადგანაც მას შეუძლია გავლენა მოახდინოს მატჩებზე, იზიდავს უამრავ მოწინააღმდეგე ფეხბურთელს და მოქმედებს მეტოქე გუნდების დაცვაზე. ის მსოფლიოს ერთ-ერთი საუკეთესოა და ჩემთვის პრივილეგიაა მისი გაწვრთნა.“ არბელოამ შაბათის მატჩისთვის ტაქტიკის შეცვლა გადაწყვიტა და დაადასტურა, რომ კილიან მბაპეს სათადარიგო სკამზე დატოვების გადაწყვეტილება, „ბენფიკასთან“ უეფას ჩემპიონთა ლიგის მატჩის წინ, გამოწვეული იყო ფრანგის მუხლის არეში დისკომფორტით. „მან ამ სეზონში მცირე მუხლის დისკომფორტთან გამკლავება საკმაოდ დიდი ხანია დაიწყო, როგორც მოგეხსენებათ,“ - განუმარტა მან მედიას. „ის დიდ ძალისხმევას დებს ყოველ ჯერზე, როდესაც მოედანზე გადის და ჩვენ გადავწყვიტეთ, რისკზე არ წავსულიყავით, რათა სამშაბათისთვის მზად ყოფილიყო სასტარტოში.“ „ჩვენ არ შეგვიძლია ნებისმიერ შედეგს დავჯერდეთ – უნდა გავიდეთ და მოვიგოთ ეს მატჩი,“ - გააფრთხილა არბელოამ „რეალის“ ლისაბონში გამგზავრებამდე, სადაც ისინი შეხვდებიან იმ გუნდს, რომელმაც ჩემპიონთა ლიგის ტოპ-რვიანის მიღმა დატოვა ისინი მეკარე ანატოლი ტრუბინის დრამატული გოლით დამატებით დროში.