„არსენალი“ დღეს პრემიერ ლიგის მატჩში „ვულვერჰემპტონ უონდერერსს“ დაუპირისპირდება. გავრცელებული ინფორმაციით, მთავარმა მწვრთნელმა მიკელ არტეტამ გადაწყვიტა, ბუკაიო საკა „ათიანის“ პოზიციაზე გამოიყენოს. შეტევაში ნონი მადუეკე ვიქტორ გიოკერეშთან და გაბრიელ მარტინელისთან ერთად ითამაშებს. არტეტამ საკა ამ პოზიციაზე კვირას, ინგლისის თასზე, „უიგან ათლეტიკის“ წინააღმდეგაც ათამაშა, მისი გეგმები კი რიკარდო კალაფორის დაზიანებამ შეცვალა გახურების დროს. მაილს ლუის-სკელი ნახევარმცველის პოზიციაზე უნდა ეთამაშა, მაგრამ იტალიელი მცველის ტრავმის შემდეგ მარცხენა მცველად გადაინაცვლა. საკა თავდაპირველად სათადარიგოთა სკამზე იყო დასახელებული, თუმცა მატჩის შემდეგ არტეტამ განაცხადა, რომ მომავალში ის „ათიანის“ პოზიციაზე უფრო რეგულარულად ითამაშებდა. „მეთოფეთა“ ფლანგის შემტევმა „უიგანის“ წინააღმდეგ თავი კარგად წარმოაჩინა, რის შემდეგაც „არსენალის“ ბოსმა გადაწყვიტა, რომ დღესაც ნახევარმცველის პოზიციაზე დააყენოს, ნაცვლად მისი ჩვეული ფლანგური პოზიციისა. კლუბი მზადაა „მგლების“ წინააღმდეგ შეტევითი ფეხბურთი ითამაშოს და გასაკვირი არ არის, რომ არტეტა დღეს ტაქტიკურ ექსპერიმენტებს ატარებს. „მოლინოზე“ მოგება მათ ტიტულისთვის ბრძოლაში „მანჩესტერ სიტის“ შვიდი ქულით დააწინაურებს, რომელიც „ნიუკასლ იუნაიტედს“ შაბათს დაუპირისპირდება.