ბარსელონას, მადრიდის „ატლეტიკოსა“ და „ჟირონასთან“ განცდილი ორი დრამატული მარცხის შემდეგ, სასწრაფოდ სჭირდება ოპტიმიზმის მიზეზები. მარტისთვის გუნდს შესაძლოა სრული შემადგენლობა ჰყავდეს, ანდრეას კრისტენსენის გარდა. „მონტილივიზე“ შეშფოთება გამოიწვია მცველ ერიკ გარსიას მდგომარეობამ, რომელიც მოედნიდან 15 წუთით ადრე გაიყვანეს. გარსია, „ბარსელონას“ ამ სეზონში ყველაზე ხშირად გამოყენებული ფეხბურთელი, ტრავმის თავიდან აცილების მიზნით შეცვალეს, თუმცა როგორც ჩანს, მისი კუნთები უბრალოდ გადაღლილი იყო. MD-ის ინფორმაციით, ტრავმა გამოირიცხა. კიდევ უფრო იმედისმომცემია ის ფაქტი, რომ „ბარსელონას“ პედრი გონსალესი შესაძლოა ამ შაბათ-კვირას „ლევანტესთან“ მატჩში დაუბრუნდეს. ესპანელმა ნახევარმცველმა ბარძაყის კუნთის დაზიანების გამო გუნდის ბოლო შვიდი თამაში გამოტოვა. „ბარსელონამ“ მის გარეშე ჩატარებული ხუთი მატჩი მოიგო გასულ კვირამდე, თუმცა მისი არყოფნა აშკარად იგრძნობოდა როგორც მადრიდში, ისე ჟირონაში. „დიარიო AS“-ის ცნობით, პედრი შესაძლოა კვირას, „ლევანტესთან“ მატჩში დაუბრუნდეს მოედანს. გეგმა ასეთია, რომ ის შეცვლაზე შევა და 15 წუთს ითამაშებს, თუ ყველაფერი კარგად წავა. მომდევნო კვირას კი, „ვილიარეალთან“ მატჩში, ის შესაძლოა ძირითად შემადგენლობაშიც ვიხილოთ. კვირას მას ტრავმის გამო მოედნის მიღმა გატარებული ერთი თვე შეუსრულდება, თუმცა თავდაპირველი დიაგნოზი ოთხიდან ექვს კვირამდე პერიოდს მოიცავდა. ამასობაში, კიდევ ორი ტრავმირებული ფეხბურთელი გავი და მარკუს რაშფორდი არიან. ინგლისელმა თავდამსხმელმა მუხლის ტკივილის გამო გუნდის ბოლო ორი თამაში გამოტოვა, თუმცა ეს დარტყმითი ტრავმა იყო და მოლოდინია, რომ ის „ლევანტესთანაც“ შეძლებს თამაშს. გავი, რომელიც ბოლო ექვსი თვის განმავლობაში არ უთამაშია, შესაძლოა უფრო ნელა დაუბრუნდეს გუნდს, თუმცა ის უკვე ბურთით ვარჯიშობს. მისი მოედანზე დაბრუნებაც მარტშია მოსალოდნელი.