„ბრაიტონი“ ორ ძმასთან ერთად გაფორმებას ცდილობს - საინტერესო სატრანსფერო სტრატეგია

„ბრაიტონ ენდ ჰოუვ ალბიონი“ შესაძლოა ცდილობდეს, გერმანული „კელნის“ თავდამსხმელ საიდ ელ მალასთან კონტრაქტის გაფორმებას მისი 20 წლის ძმის, მალეკ ელ მალასთვის შეთავაზების გაკეთებით ხელი შეუწყოს. როგორც ირკვევა, „ბრაიტონის“ საზაფხულო გეგმა ასეთია: მათ სურთ საიდ ელ მალას (19) და მისი ძმის, მალეკ ელ მალას (20) ერთდროულად გაფორმება, რათა მათ ერთად შეძლონ საზღვარგარეთ გადასვლა და ერთმანეთისთვის მაქსიმალური მხარდაჭერა. მალეკის განვითარება „ბრაიტონის“ U21 გუნდში, პრემიერ ლიგა 2-შია ნავარაუდევი – ეს არის ევროპის ერთ-ერთი უძლიერესი ახალგაზრდული ლიგა, რომელშიც 29 გუნდი, მათ შორის ყველა ტოპ-კლუბის U21 გუნდი მონაწილეობს. „ბრაიტონი“ ცდილობს, „ბაიერნსა“ და სხვა დაინტერესებულ კლუბებს გაასწროს. უკვე შეთავაზებულია 30 მილიონი ევროს პაკეტი (ბონუსების ჩათვლით), რომელიც უარყოფილი იქნა. ორივე ფეხბურთელისთვის ხუთწლიანი კონტრაქტებია მომზადებული. ინფორმაციას Sky Sport DE ავრცელებს. ეს „ბრაიტონის“ საინტერესო სტრატეგიაა, რადგან საიდ ელ მალას გერმანიიდან წამოყვანა ამ ეტაპზე რთულად მიიჩნევა. ნაცნობი სახის გვერდით ყოფნა 19 წლის ფეხბურთელს კომფორტს შეუქმნის, თუ მას საზღვარგარეთ გადასვლისას რაიმე შიში გაუჩნდება.