ჩელსის მცველი მამადუ სარი: „ვან დეიკი ჩემი მისაბაძი მაგალითია, მსოფლიოში საუკეთესო ცენტრალური მცველი მინდა ვიყო“

„ჩელსის“ მცველმა მამადუ სარმა „ლივერპულის“ კაპიტანი ვირჯილ ვან დეიკი თავის მისაბაძ მაგალითად დაასახელა და გააჟღერა ამბიცია, რომ სურს იყოს „მსოფლიოს საუკეთესო ცენტრალური მცველი“. სარი „ჩელსიში“ დაბრუნდა მას შემდეგ, რაც მთავარმა მწვრთნელმა ლიამ როსენიორმა მისი იჯარის ვადა „სტრასბურგში“ შეამცირა. 20 წლის ფეხბურთელმა საფრანგეთის კლუბში როსენიორის ხელმძღვანელობით შთამბეჭდავად ითამაშა და სენეგალის ნაკრების წევრი იყო, რომელმაც წელს აფრიკის ერთა თასი მოიგო. მან სეზონში პირველი მატჩი ჩაატარა, როდესაც „ჩელსიმ“ პარასკევს საღამოს FA თასზე „ჰალ სიტი“ 4:0 დაამარცხა. მცველი „ლურჯების“ დაცვის ხაზში თავს კომფორტულად გრძნობდა, რადგან „ჩელსიმ“ მეოთხე რაუნდის შეხვედრაში კარი მშრალად შეინახა. „ჩელსიში“ დაბრუნებასა და სამომავლო მიზნებზე საუბრისას, სარმა დაასახელა ფეხბურთელები, რომლებსაც ის ცდილობს მიბაძოს. მან ვან დეიკი მისაბაძ მაგალითად დაასახელა, მაგრამ მიაჩნია, რომ მისი თამაში მსგავსებას პოულობს ვან დეიკის „ლივერპულელ“ თანაგუნდელ იბრაჰიმა კონატესთან. „მინდა ვირჯილ ვან დეიკის მსგავსი ვიყო. მიყვარს ვან დეიკი. ბავშვობაში მეც ასე მეძახდნენ,“ – განუცხადა მან ESPN-ს. „მაგრამ ზოგიერთი მეუბნება, რომ იბრაჰიმა კონატეს მსგავსად ვთამაშობ. ძალიან ჰგავს. ის ლიდერია. მცველისთვის ძალიან მნიშვნელოვანია იყოს ლიდერი. მოედანზეც და მის ფარგლებს გარეთაც ბევრს ვლაპარაკობ. ეს მნიშვნელოვანი სამუშაოა. ვფიქრობ, კარგად ვუძღვები თამაშს. ბურთთან ერთად, შემიძლია კარგი პასი გავაკეთო. ბავშვობაში ოცნება მქონდა. მინდოდა მსოფლიოს საუკეთესო ცენტრალური მცველი გავმხდარიყავი.“