„ჩელსის“ ყოფილმა ნახევარმცველმა ემანუელ პეტიმ კლუბს მეტი თანმიმდევრულობისა და სტაბილურობისკენ მოუწოდა. როგორც ვიცით, „ჩელსი“ ახალი მფლობელობის პირობებში რეგულარულად ცვლის მწვრთნელებს და ასევე მოთამაშეებს, თითქმის ყოველ სატრანსფერო ფანჯარაზე ახალ ფეხბურთელებს აფორმებს. ამან დიდი კრიტიკა გამოიწვია პროექტისა და ახალი მფლობელობის მართვის სტილის მიმართ, თუმცა მსგავსი მოქმედების მეთოდი თანამედროვე ფეხბურთში საკმაოდ გავრცელებულია და სიმართლე გითხრათ, „ჩელსიში“ რომან აბრამოვიჩის დროსაც ძალიან ხშირი იყო. აბრამოვიჩი ამგვარად მოქმედებდა იმისთვის, რომ რეგულარულად მოეგო ყველა ძირითადი ტიტული, რაც წარმატებით ახერხებდა „ლურჯების“ მფლობელობის პერიოდში. თუმცა, ჯერჯერობით, ახალ მფლობელობას ამ კუთხით იგივე წარმატებისთვის არ მიუღწევია, მიუხედავად იმისა, რომ საკლუბო მსოფლიო ჩემპიონატის მოგება წარმატებად ითვლება. ემანუელ პეტიმ TalkSport-თან ისაუბრა და აღნიშნა, რომ კლუბის მართვის არაპროგნოზირებადი მეთოდი ნიშნავს, რომ გრძელვადიანი წარმატება გარანტირებული არ არის. „შეუძლია თუ არა ლიამ როსენიორს ოდესმე პრემიერ ლიგის ტიტულის მოგება „ჩელსისთან“ ერთად? ისინი მოთამაშეებს ყოველწლიურად ცვლიან. ამიტომ, თანმიმდევრულობა და სტაბილურობა ძალიან მნიშვნელოვანია, თუ რამის მოგება გსურთ“, - განაცხადა მან Ignition Casino-ს მეშვეობით. „თქვენ უნდა შეინარჩუნოთ თქვენი მოთამაშეები, გქონდეთ ხედვა და მიჰყვეთ მას. არ აქვს მნიშვნელობა, ბნელ გვირაბებში გიწევთ გავლა, უნდა მიჰყვეთ თქვენს გზას. უნდა გჯეროდეთ მისი. გასახდელში უნდა გააგზავნოთ მესიჯი, რომ რაც არ უნდა მოხდეს მოედანზე, თუნდაც ცუდი შედეგები გვქონდეს, ჩვენ ჩვენს იდეებს მივყვებით. „ლივერპულმა“ ეს გააკეთა და მოიგო ტიტულები. „სიტიმ“ ეს გააკეთა და მოიგო ტიტულები. „არსენალი“ ამას წლებია აკეთებს და ტიტულის მოგებასთან ახლოსაა. ვნახავთ სეზონის ბოლოს“. პეტიმ ასევე გააფრთხილა როსენიორი, რომ ის მხოლოდ „სამი-ოთხი“ ცუდი შედეგის მოშორებით არის გათავისუფლებიდან, ასეთია „ჩელსის“ მხეცური ბუნება. „შეხედეთ „მანჩესტერ იუნაიტედს“, შეხედეთ „ტოტენჰემს“, შეხედეთ „ჩელსის“, ყველა ამ კლუბს“, - განაგრძო ფრანგმა. „ისინი იმდენჯერ ცვლიდნენ მოთამაშეებს და მწვრთნელებს. და შემდეგ მოულოდნელად გინდათ, რომ მათ ტიტული მოიგონ? და მე მეკითხებით, შეუძლია თუ არა ლიამ როსენიორს „ჩელსისთან“ ერთად ტიტულის მოგება? არ ვარ დარწმუნებული, იქნება თუ არა ის მწვრთნელი 10 თვეში. თუ ზედიზედ სამი ან ოთხი ცუდი შედეგი ექნება, არ გამიკვირდება, თუ დირექტორთა საბჭო გაათავისუფლებს“.