რონდა რაუზი და ჯინა კარანო შერეული საბრძოლო ხელოვნების (MMA) ბრძოლაში შეხვდებიან. კომპანია Most Valuable Promotions-მა (MVP) სამშაბათს განაცხადა, რომ ორი საკულტო ქალი მებრძოლი ერთმანეთს MMA-ის ბრძოლაში 16 მაისს დაუპირისპირდება. ღონისძიება ლოს-ანჯელესის „ინტუიტ დოუმში“ გაიმართება და ექსკლუზიურად ნეტფლიქსზე გადაიცემა. ეს დაპირისპირება ქალთა ქვემსუბუქი წონის დივიზიონში შედგება. „ამას იმდენ ხანს ველოდებოდი! მე და ჯინა კარანო ქალთა საბრძოლო სპორტის ისტორიაში უდიდეს სუპერ ბრძოლაში დავუპირისპირდებით ერთმანეთს“, – განაცხადა რაუზიმ პრესრელიზში. „ჩვენ ვთანამშრომლობთ მებრძოლების ინტერესებზე ორიენტირებულ პრომოუტერ MVP-სთან, ასევე პლანეტის უდიდეს სტრიმინგ პლატფორმა ნეტფლიქსთან. ეს არის ყველა MMA გულშემატკივრისთვის – წარსულის, აწმყოსა და მომავლისთვის. მეტი იქნება... ბევრად მეტი.“ „რონდა მოვიდა ჩემთან და მითხრა, რომ მხოლოდ ჩემთვის დაბრუნდებოდა და ჩვენ შორის ეს ბრძოლა მისი ოცნება იყო“, – თქვა კარანომ. „მან მადლობა გადამიხადა კარიერაში გზების გახსნისთვის და პატივისცემით მთხოვა ამ ბრძოლის გამართვა. ეს ჩემთვის დიდი პატივია. მჯერა, რომ ამ ბრძოლიდან გამარჯვებული გამოვალ და ველოდები, რომ ეს ადვილი არ იქნება, რასაც მივესალმები. ეს ისეთივე მნიშვნელოვანია რონდასთვის და ჩემთვის, როგორც გულშემატკივრებისა და შერეული საბრძოლო ხელოვნების საზოგადოებისთვის. რა დროა, რომ ვცხოვრობთ!“ UFC-ის ყოფილი მსოფლიო ჩემპიონი რაუზი, პირველად იასპარეზებს მას შემდეგ, რაც ჰოლი ჰოლმთან და ამანდა ნუნესთან ზედიზედ ბრძოლებში დამარცხდა. „რაუდი“ (მეტსახელი) თითქმის ათწლიანი პაუზის შემდეგ ბრუნდება, რა დროსაც მან WWE-შიც იასპარეზა. კარანო ოქტაგონიდან 2009 წლის აგვისტოს შემდეგ არ გამოჩენილა, როდესაც „სტრაიქფორსის“ ეგიდით ერთადერთი პროფესიონალური მარცხი კრის საიბორგთან განიცადა. 43 წლის მებრძოლმა ბოლო დროს გავრცელებული საწვრთნელი ვიდეოებით ვარაუდები გამოიწვია, რაც ახლა რეალობად იქცა. „MVP ყოველთვის ორიენტირებული იყო ინოვაციებზე და საბრძოლო სპორტში უდიდესი მომენტების გლობალურ დონეზე მიწოდებაზე, დღეს კი ჩვენ ოფიციალურად ვართებთ ამ ენერგიას MMA-ს პირველად“, – განაცხადეს MVP-ის თანადამფუძნებლებმა ჯეიკ პოლმა და ნაკისა ბიდარიანმა. „რონდა რაუზი და ჯინა კარანო ქალთა MMA-ის ისტორიაში ორი ყველაზე გავლენიანი ფიგურა არიან; ისინი არიან ხატები, რომლებმაც დაამსხვრიეს „შუშის ჭერი“ და ხელი შეუწყვეს ამ სპორტის საფუძვლის ჩაყრას. MVP-ის რწმენა ქალთა კრივში განპირობებული იყო რონდა რაუზის მიერ მიღწეული წარმატებით, რომელიც თავისი კარიერის განმავლობაში MMA-ის მთელი სპორტის უდიდესი ვარსკვლავი იყო.“ „ჩვენი საკრივო პარტნიორობის უპრეცედენტო წარმატების შემდეგ, ჩვენ ვამტკიცებთ, რომ MVP-სა და ნეტფლიქსს შეუძლიათ შექმნან ბლოკბასტერული ლაივ ღონისძიებები მრავალ სპორტის სახეობაში, რომლებიც გულშემატკივრებს თაობების განმავლობაში ჩართავს. ეს არის ის, რასაც ჩვენ ვაკეთებთ.“ ბრძოლის მომზადება 5 მარტს ლოს-ანჯელესში გამართული პრესკონფერენციით დაიწყება.