ტურინის „იუვენტუსმა“ 2025/26 სეზონის მესამე ფორმა წარადგინა – განსაცვიფრებელი დიზაინით, რომელიც კლუბის მშობლიური რეგიონის, პიემონტის ვენახებით არის შთაგონებული. კლუბის მიერ სეზონური თხრობის – „იტალიური სრულყოფილება“ – გაგრძელებით, მესამე მაისური ახალი თავია იმ ნარატივში, რომელიც მოდისგან შთაგონებული საშინაო ფორმითა და ზაფხულის აღსანიშნავი გასვლითი მაისურით დაიწყო. ამჯერად, აქცენტი რეგიონის კიდევ ერთ კულტურულ საყრდენზე – ღვინოზე კეთდება. მაისურზე გამოსახულია ყურძნის მოტივებზე დაფუძნებული გრაფიკული დიზაინი, რომელიც დახვეწილი ფერთა პალიტრით – შავი, ბორდოსფერი და მუქი მწვანე – მთელ ტანზე შეუმჩნევლად არის გადანაწილებული. კლასიკური განწყობის გასაძლიერებლად, „ადიდასის“ Trefoil ლოგო კვლავ ბრუნდება, ისევე როგორც ეს გასული სეზონის მესამე ფორმაზე იყო, ხოლო „იუვენტუსის“ საკულტო ზებრის ლოგოც საპატიო ადგილს იკავებს. მოულოდნელ სიახლეს წარმოადგენს მუქი მწვანე სამი ზოლი, რომელიც მხრებზეა განთავსებული და რეტრო დეტალებს თანამედროვე ელფერს სძენს. დიზაინს ასრულებს ბრტყელი ნაქსოვი V-ყელის საყელო და მკლავების მანჟეტები, რომლებიც თანამედროვე კერვას ვინტაჟურ მინიშნებებთან აბალანსებს. ფორმა სრულდება შავი შორტებით, რომლებსაც კლუბის ლოგოზე თეთრი აქცენტები და შესაბამისი მუქი მწვანე სამი ზოლი ამშვენებს, ასევე შავი წინდებით, რომლებიც მთლიან იერსახეს აერთიანებს. „იუვენტუსის“ 2025/26 სეზონის მესამე ფორმა უკვე ხელმისაწვდომია „ადიდასის“, კლუბის ოფიციალური ონლაინ მაღაზისისა და შერჩეული გლობალური საცალო ვაჭრობის ობიექტებში.