მანჩესტერ იუნაიტედი მზადაა, ჯეიდონ სანჩო სეზონის ბოლოს, კონტრაქტის ამოწურვის შემდეგ, თავისუფალი აგენტის სტატუსით გაუშვას. მანამდე გავრცელებული ინფორმაციით, „წითელი ეშმაკები“, მიუხედავად იმისა, რომ მის გამოყენებას არ აპირებდნენ, სანჩოს კონტრაქტში არსებულ ერთწლიან ოფციას გაააქტიურებდნენ, რათა მის მომავალზე კონტროლი შეენარჩუნებინათ. ასეთი ნაბიჯი „იუნაიტედს“ საშუალებას მისცემდა, მის პოტენციურ მსურველთაგან სატრანსფერო თანხა მოეთხოვა, რაც გასაგებია, თუ გავითვალისწინებთ, რომ კლუბმა მასში 2021 წელს 73 მილიონი ფუნტი გადაიხადა. თუმცა, როგორც ქეთრინ უოლში იტყობინება, ფეხბურთელის გაგრძელებულმა არადამაკმაყოფილებელმა ასპარეზობამ კლუბის ხელმძღვანელობა ამ გეგმის განხორციელებისგან შეაჩერა. მათ შეცვალეს გადაწყვეტილება მას შემდეგ, რაც მიიჩნიეს, რომ არ ღირს რისკზე წასვლა იმის გამო, რომ არც ერთმა კლუბმა არ იყიდოს ის და შესაბამისად, 25 წლის ფეხბურთელი კიდევ ერთი სეზონით შეინარჩუნონ თავისი უზომოდ მაღალი, კვირაში 200,000 ფუნტის ხელფასით. აღსანიშნავია, რომ გასულ სეზონში ჩელსიმ 5 მილიონი ფუნტის ჯარიმის გადახდა არჩია, ვიდრე სანჩოს 25 მილიონი ფუნტის გამოსყიდვის ოფცია გაეაქტიურებინა, მიუხედავად იმისა, რომ ის 2024/2025 წლების განმავლობაში იჯარით ჰყავდათ. მიმდინარე სეზონს ის ასტონ ვილაში ატარებს და დღემდე 25 მატჩში მხოლოდ ერთი გოლითა და ერთი საგოლე გადაცემით გამოირჩა. ვილა პრემიერ ლიგის შთამბეჭდავ სეზონს ატარებს; ისინი ამჟამად მესამე ადგილზე არიან და მეორეადგილოსან მანჩესტერ სიტის მხოლოდ სამი ქულით ჩამორჩებიან – თუმცა სანჩოს მათ დიდებულ სვლაში მცირე, ან სულაც არანაირი წვლილი არ მიუძღვის. უნაი ემერიმ სანჩო ლიგაში სასტარტო შემადგენლობაში მხოლოდ ექვსჯერ გამოიყვანა, ხოლო ცხრაჯერ სათადარიგოთა სკამიდან გამოიყენა, თავდამსხმელს კი 15 მატჩში ჯერ გოლი არ გაუტანია. ჯერჯერობით გაურკვეველია, სად გააგრძელებს ის კარიერას „იუნაიტედთან“ თავისი თავგადასავლის დასრულების შემდეგ – შესაძლოა, გერმანიაში დაბრუნდეს, სადაც დორტმუნდის ბორუსიასთან ერთად საუკეთესო პერიოდი ჰქონდა.