ნორვეგიელმა მოთხილამურე-მრბოლელმა იოჰანეს ჰიოსფლოტ კლაბომ კვირას ზამთრის ოლიმპიური თამაშების ისტორიაში ყველაზე მეტი – მეცხრე ოქროს მედალი მოიპოვა და რეკორდი დაამყარა. ეს ოქრო 2026 წლის ზამთრის ოლიმპიადაზე მისთვის მეოთხე იყო, მანამდე მან გაიმარჯვა 10 კმ თავისუფალ სტილში, 20 კმ სკიაითლონსა და მამაკაცთა ინდივიდუალურ სპრინტში. 29 წლის კლაბომ თავისი სარეკორდო მედალი მამაკაცთა 4 X 7.5 კმ ესტაფეტის გუნდის შემადგენლობაში მოიპოვა, რომელმაც შეჯიბრში საფრანგეთსა და მასპინძელ იტალიას აჯობა. ის ესტაფეტის ბოლო მონაწილე იყო, ემილ ივერსენის, მარტინ ლოვსტრომ ნიენგეტისა და ეინარ ჰედეგარტის შემდეგ. ნორვეგიამ ფინიშს 1:04:24.5 დროით მიაღწია, რითაც 22 წამით აჯობა საფრანგეთს (1:04:46.7) და 47.9 წამით იტალიას (1:05:12.4). შესაძლოა, გუნდს კიდევ უფრო სწრაფი დრო ჰქონოდა, მაგრამ კლაბომ ფინიშთან ახლოს ცოტა შეანელა სვლა, რათა მაყურებლებისთვის ხელი დაექნია. შეერთებულმა შტატებმა ამ შეჯიბრში მეექვსე ადგილი დაიკავა (1:06:11.8), ფინეთისა და კანადის შემდეგ. ნორვეგიული მედიის მიერ „რაკეტის კაცად“ შერაცხულმა კლაბომ მანამდე სამი ოქროს მედალი მოიპოვა 2018 წლის პიონგჩანგის თამაშებზე, სადაც პირველი იყო ინდივიდუალურ სპრინტში, 4 x 10 კმ ესტაფეტასა და გუნდურ სპრინტში. 2022 წელს მან ოქრო მოიპოვა პეკინის ინდივიდუალურ და გუნდურ სპრინტულ შეჯიბრებებში. მეცხრე ოქროს მედლით კლაბომ გადაასწრო თავის თანამემამულე ნორვეგიელ მოთხილამურე-მრბოლელებს, ბიორნ დელიესა და მარიტ ბიორგენს, ასევე თანამემამულე ბიატლეტ ულე ეინარ ბიორნდალენს. კლაბო მილან-კორტინას თამაშებზე კიდევ ორ შეჯიბრში მიიღებს მონაწილეობას: მამაკაცთა გუნდურ სპრინტსა და 50 კმ მასობრივ სტარტში. 2026 წლის თამაშებზე მეხუთე ოქროს მედალი მას გაუთანაბრებდა ამერიკელ სიჩქარის მოციგურავე ერიკ ჰეიდენს, რომელმაც ერთ ზამთრის ოლიმპიადაზე ყველაზე მეტი ოქრო მოიპოვა.