"დალას მავერიქსის" დებიუტანტ კუპერ ფლეგის NBA-ის სადებიუტო მატჩის პირველ ტაიმში ნახმარი მაისური Sotheby's-მა კერძო გზით 1 მილიონ დოლარად გაყიდა. ეს რეკორდული მაჩვენებელია როგორც ფლეგის საკოლექციო ნივთისთვის, ასევე NBA Auctions-ის მიერ გაყიდული მაისურისთვის. ფლეგმა თავის პირველ რეგულარული სეზონის მატჩში, რომელიც 22 ოქტომბერს „სან ანტონიო სპურსთან“ 125-92 წაგებით დასრულდა, 10 ქულა და 10 მოხსნა დააგროვა. ამ სეზონში ფლეგი გახდა NBA-ის ისტორიაში ყველაზე ახალგაზრდა მოთამაშე, რომელმაც ერთ მატჩში 40 ქულა დააგროვა და მას ასევე ეკუთვნის თინეიჯერის მიერ ერთ მატჩში დაგროვებული ქულების რეკორდი (49). „კუპერ ფლეგის სადებიუტო მაისურისთვის მიღებული 1 მილიონი დოლარი მკაფიო დასტურია იმისა, თუ რა მნიშვნელობას ანიჭებენ კოლექციონერები სპორტში ნამდვილ „პირველ მომენტებს““, - ნათქვამია Sotheby's-ის თანამედროვე საკოლექციო ნივთების განყოფილების ხელმძღვანელის, ბრამ ვახტერის განცხადებაში. „ეს მაისური განსაკუთრებული კარიერის დასაწყისს ასახავს, კარიერის, რომელიც უზარმაზარ მოლოდინებსა და მღელვარებას იწვევს.“ წინა რეკორდი NBA Auctions-ის მიერ გაყიდული მაისურისთვის იყო ვიქტორ ვემბანიამას მაისური, რომელიც მან NBA-ის დებიუტის მეორე ტაიმში ეცვა და 2023 წლის ნოემბერში 762 000 დოლარად გაიყიდა. Sotheby's-ის NBA-ის დებიუტანტების აუქციონი 17-23 მარტს გაიმართება და მასზე წარმოდგენილი იქნება VJ Edgecombe-ის, Kon Knueppel-ის, Dylan Harper-ის, Derik Queen-ის და სხვა მოთამაშეების სადებიუტო მაისურები.