ლეგენდარული მოკრივეების, მაიკ ტაისონისა და ფლოიდ მეივეზერ უმცროსის საჩვენებელი კრივის მატჩისთვის როგორც ადგილი, ასევე თარიღი ცნობილია. დეკემბერში ტაისონმა განაცხადა, რომ ორთაბრძოლა მარტში, აფრიკაში გაიმართებოდა, თუმცა მარტის ნაცვლად, ისინი ერთმანეთს 25 აპრილს, კონგოს დემოკრატიულ რესპუბლიკაში დაუპირისპირდებიან. ორშაბათს, ჟურნალ Ring Magazine-ის ჟურნალისტმა მაიკ კოპინგერმა გაავრცელა ინფორმაცია ადგილმდებარეობისა და თარიღის შესახებ. ცოტა ხნის წინ, ფლოიდ მეივეზერი მოლაპარაკებებს აწარმოებდა მენი პაკიაოსთან განმეორებითი ბრძოლის შესახებ Netflix-ზე. როდესაც ეს მოლაპარაკებები შეფერხდა, ტაისონის წინააღმდეგ საჩვენებელი ორთაბრძოლა კვლავ დღის წესრიგში დადგა. კონგოს ვიცე-პრემიერ-მინისტრმა, მობუტუ ნზანგა ნგბანგავემ, თარიღი და ადგილმდებარეობა სოციალური მედიის, კერძოდ X-ის საშუალებით დაადასტურა. „ძალიან მიხარია, რომ @RingMagazine-ის @MikeCoppinger-ისგან ასეთი შესანიშნავი ამბები გავიგე, რომ კრივის ლეგენდები @MikeTyson და @FloydMayweather ერთმანეთს საჩვენებელ მატჩში 25 აპრილს, კონგოს დემოკრატიულ რესპუბლიკაში დაუპირისპირდებიან, რითაც პატივს მიაგებენ „ბრძოლა ჯუნგლებში“-ს მემკვიდრეობას 52 წლის შემდეგ“, – დაწერა მან. 59 წლის ტაისონმა ბოლოს 2024 წლის ნოემბერში იბრძოლა, როდესაც ჯეიკ პოლთან ერთსულოვანი გადაწყვეტილებით დამარცხდა. ამ ორთაბრძოლას Netflix-ზე 100 მილიონმა მაყურებელმა უყურა. 48 წლის მეივეზერს პროფესიონალურად 2017 წლის შემდეგ არ უჩხუბია, თუმცა პენსიაზე გასვლის შემდეგ რამდენიმე საჩვენებელი ორთაბრძოლა გამართა. მისი ბოლო მატჩი იყო 2024 წლის აგვისტოში ჯონ გოტი III-ის წინააღმდეგ.