ჩემპიონშიპში გადარჩენისთვის მებრძოლმა „ლესტერ სიტიმ“ დაადასტურა, რომ ყოფილი ფეხბურთელი გარი როუეტი სეზონის ბოლომდე გუნდის ახალი მთავარი მწვრთნელი იქნება. „ბიბისის“ რადიო „ლესტერმა“ ადრე იტყობინებოდა, რომ 51 წლის სპეციალისტი, რომელიც ორი თვის წინ „ოქსფორდის“ მწვრთნელის პოსტიდან გაათავისუფლეს, ოთხშაბათს „მელიების“ ვარჯიშს უძღვებოდა. როუეტი მარტი სიფუენტესს შეცვლის, რომელიც სამი კვირის წინ გაათავისუფლეს, მისი პირველი მატჩი კი შაბათს „სტოკ სიტისთან“ იქნება. „ლესტერი“ ჩემპიონშიპის ცხრილის ბოლოდან მესამე ადგილზეა და გადარჩენის ზონას ორი ქულით ჩამორჩება, სეზონის დასრულებამდე 14 მატჩია დარჩენილი. „ძალიან ვამაყობ, რომ „ლესტერ სიტის“ ახალი მწვრთნელი ვარ და მაქვს შესაძლებლობა, უახლოესი თვეების განმავლობაში ვიმუშაო და ვუძღვებოდე მართლაც ნიჭიერ ჯგუფს“, - განუცხადა როუეტმა კლუბის ვებგვერდს. „ყველასთვის ძალიან ნათელია, თუ რა უნდა მივაღწიოთ ახლა და სეზონის ბოლომდე და მუშაობა დაუყოვნებლივ დაიწყება. მოუთმენლად ველი კავშირების დამყარებას ფეხბურთელებთან, კლუბის პერსონალთან და გულშემატკივრებთან – ეს ყველაფერი სასიცოცხლოდ მნიშვნელოვანი იქნება ჩვენთვის საჭირო შედეგების მისაღწევად.“ როუეტი, რომელიც 2000 წელს „ბირმინგემ სიტიდან“ გადასვლის შემდეგ ორი წელი „ლესტერის“ მოთამაშე იყო, მანამდე ჩემპიონშიპის ხუთ კლუბს წვრთნიდა. ის ხელმძღვანელობდა „ბირმინგემს“, „დერბი ქაუნთის“, „სტოკს“, „მილუოლს“ და ბოლოს „ოქსფორდს“, სადაც დაახლოებით ერთი წელი გაატარა, სანამ 2025 წლის დეკემბერში გაათავისუფლებდნენ. როუეტის ყოფილი თანაგუნდელი „მელიების“ დაცვის ხაზიდან, კალუმ დევიდსონი, მისი ასისტენტი იქნება. „ლესტერმა“ დროებითი მწვრთნელის, ენდი კინგის, ხელმძღვანელობით ოთხივე მატჩი წააგო და ასევე, ამ პერიოდში, ხანგრძლივი სამართლებრივი ბრძოლის შემდეგ, ხარჯვის წესების დარღვევისთვის ექვსი ქულა ჩამოაკლდა. ქულების ჩამოკლებამ, შვიდმატჩიან მოუგებელ სერიასთან ერთად, რომელიც ექვს დამარცხებას მოიცავდა, „ლესტერი“ გავარდნის ზონაში ჩააგდო. ისინი შაბათს ბოლო სამეულში ჩავარდნენ, მას შემდეგ რაც „ბლექბერნ როვერსმა“ „ქუინს პარკ რეინჯერსის“ დამარცხებით მათ გადაუსწრო, „მელიები“ კი ინგლისის ასოციაციის თასიდან „საუთჰემპტონმა“ გამოაგდო. „გარი არის მწვრთნელი, რომელსაც ჩემპიონშიპის ღრმა ცოდნა და იმ სიტუაციის გამოცდილება აქვს, რომლის წინაშეც ახლა ვდგავართ სეზონის ბოლო 14 მატჩში – ლიგაში გადარჩენისთვის ბრძოლა“, - განაცხადა „ლესტერის“ თავმჯდომარემ აიავატ სრივადჰანაპრაბჰამ. „ეს არის ამოცანა, რომელზეც მთელი კლუბი კონცენტრირებულია და ჩვენ გარის ყველა შესაძლო მხარდაჭერას აღმოვუჩენთ, რათა დაგვეხმაროს საჭირო გადაწყვეტილებების მოძიებაში. მადლობელი ვარ ენდი კინგის იმ პროფესიონალიზმისა და თავდადებისთვის, რომლითაც მან რთულ ვითარებაში მოამზადა გუნდი ბოლო მატჩებისთვის. პირველი გუნდის ამჟამინდელ პერსონალთან ერთად, ის დარჩება ჩვენი სამწვრთნელო გუნდის ღირებულ ნაწილად, რაც უზრუნველყოფს მნიშვნელოვან უწყვეტობას, რის საფუძველზეც გარი და კალუმი შეძლებენ მუშაობის გაგრძელებას.“