მცველი ლიამ გორდონი „მაზერველის“ გულშემატკივრებს მიმდინარე სეზონში ჰემპდენის სტადიონზე ტრიუმფზე ოცნებისკენ მოუწოდებს. იენს ბერტელ ასკუს გუნდი ოთხშაბათს „პიტოდრის“ სტადიონზე გაემგზავრება, სადაც შოტლანდიის თასის მეხუთე რაუნდის გადადებულ მატჩში „აბერდინს“ დაუპირისპირდება. გამარჯვებული მეოთხედფინალში „დანფერმლაინს“ შეხვდება. „მაზერველი“ შოტლანდიის პრემიერლიგის სატურნირო ცხრილში მეოთხე ადგილზეა, ლიდერ „ჰართსს“ 10 ქულით ჩამორჩება და ერთი თამაშით ნაკლები აქვს ჩატარებული. ამასთან ერთად, გუნდი ქვეყანაში ერთ-ერთ ყველაზე თვალისმომჭრელ ფეხბურთს აჩვენებს. მიუხედავად იმისა, რომ გორდონმა იცის, თასის ფინალში გასვლა და ტიტულის მოპოვება რთული ამოცანა იქნება, ის არანაირ პრობლემას ვერ ხედავს იმაში, რომ გულშემატკივრებმა ირწმუნონ, რომ ეს შეიძლება მოხდეს პირველად 1991 წლის შემდეგ. „ყველას უნდა ჰქონდეს ოცნებები“, – განაცხადა 30 წლის ფეხბურთელმა. „ყველას აქვს ოცნებები და მისწრაფებები და ჩვენც არ განვსხვავდებით გასახდელში. ყველას გვინდა, რომ განსაკუთრებული საქმეები გავაკეთოთ ჩვენს კარიერაში. ასეთი კლუბისთვის, როგორიც „მაზერველია“, ტიტულის მოპოვების შესაძლებლობა საოცარი იქნებოდა. ეს ჩვენი ოცნებაა და მათი (გულშემატკივრების) ოცნებაც უნდა იყოს. ჩვენ კარგ ფორმაში ვართ, ვიცით, რამდენად რთულია ასეთ დონეზე რამის გაკეთება, მაგრამ ვგრძნობთ, რომ გვაქვს საკმარისი ხარისხი, რომ მსგავსი რამ შევძლოთ.“ ასკუს გუნდმა მიმდინარე სეზონის დასაწყისში დაკარგა თასის ფინალში გასვლის შანსი, როდესაც ლიგის თასის ნახევარფინალში მომავალ გამარჯვებულ „სენტ მირენთან“ 4:1 დამარცხდა. მიუხედავად იმისა, რომ ეს ტკივილი ჯერ კიდევ ახალია ფეხბურთელების გონებაში, გორდონი შთაბეჭდილების ქვეშაა, თუ როგორ გაართვა თავი „მაზერველმა“ ამ წარუმატებლობას. „ჩვენ ამას კარგად გავუმკლავდით“, – დაამატა მან. „ამის შემდეგ ყველაფერი არ დანგრეულა. ლიგაში ჩვენი გამოსვლები იმდენად მაღალი და შთამბეჭდავი იყო, რომ, დიახ, ეს ახლაც გვტკივა, მაგრამ გვინდა, რომ ეს შეცდომა გამოვასწოროთ და ამის შესაძლებლობა შოტლანდიის თასზე გვაქვს.“