"ლიდს იუნაიტედი" პრემიერ ლიგის ასპარეზზე შაბათს ბრუნდება, როდესაც ბირმინგემში "ასტონ ვილას" დაუპირისპირდება. მასპინძლები შესანიშნავ ფორმაში არიან და სატურნირო ცხრილში მესამე ადგილს იკავებენ, მაგრამ "ლიდსის" მწვრთნელი, დანიელ ფარკე აცხადებს, რომ მისი გუნდი ყველა შეხვედრას სრული თავდაჯერებულობით ხვდება. პრემიერ ლიგის ბოლო მატჩში, "უაითებმა" "სტემფორდ ბრიჯზე" "ჩელსისთან" ორი ბურთის სხვაობა აღმოფხვრეს და უმნიშვნელოვანესი ქულა მოიპოვეს. მანამდე, "იუნაიტედმა" "ელანდ როუდზე" "ნოტინგემ ფორესტი" დაამარცხა ჯეიდენ ბოგლის, ნოა ოკაფორისა და დომინიკ კალვერტ-ლევინის გოლებით. დასავლეთ მიდლენდსში გამგზავრებამდე, მწვრთნელმა ფარკემ "თორპ არჩზე" მედიასთან ისაუბრა და განმარტა ის გამოწვევები, რაც მის გუნდს "ვილა პარკზე" ელოდება. ""ვილა" ჩემპიონობისთვის ბრძოლაში მესამე ადგილზეა, ამიტომ რთული თამაში იქნება", - განაცხადა მწვრთნელმა. "მათ ფანტასტიკური შედეგები აქვთ, ისინი ამ ლიგის ერთ-ერთი საუკეთესო გუნდია. უნაი ემერიმ ისინი ევროპულ ძალად აქცია." "მაგრამ ამ დონეზე ყოველთვის გიწევს რთული თამაშების ჩატარება. ჩვენ შეჩვეულები ვართ დიდი გუნდებისა და ინდივიდუალური ოსტატობის მქონე მოთამაშეების წინააღმდეგ თამაშს." "მნიშვნელოვანია, რომ შეტევაში ზედმეტად არ გაბრწყინდნენ, რადგან მათ ბევრი ინდივიდუალური ოსტატობა, მაღალი დონის მოთამაშეები ჰყავთ და ძალიან კარგად თამაშობენ." "უნდა დავრწმუნდეთ, რომ საუკეთესო თამაშს ვაჩვენებთ და ცოტა იღბალიც დაგვჭირდება. შანსების გამოყენებაში საკმაოდ ეფექტურები, დაუნდობლები და შეუპოვრები უნდა ვიყოთ." "ჩვენ ყოველთვის გვჯერა საკუთარი თავის. დავამტკიცეთ, რომ კარგი გუნდი, გამორჩეული ფიზიკური მომზადება და მენტალიტეტი გვაქვს. ამან 26 თამაშიდან 30 ქულა მოგვცა." "კარგ გზაზე ვართ, მაგრამ რეალისტი ადამიანი ვარ. ზედმეტი აღფრთოვანების მიზეზი არ არსებობს. კიდევ ბევრი ქულა უნდა მოვიგოთ და ამისთვის ფეხი გაზზე გვექნება დაჭერილი."