მარკ სირიამ მესის გიგანტური ბანერი წარადგინა და „ბარსელონაში“ მის დაბრუნებას მოითხოვს

დღეს, „ბარსელონას“ მომავალი საპრეზიდენტო არჩევნების ერთ-ერთმა პრე-კანდიდატმა, მარკ სირიამ, კლუბის ლეგენდარული ფეხბურთელის, ლიონელ მესის, გამოსახულებით გიგანტური ბანერი წარადგინა. ბანერზე აღბეჭდილი იყო რვაგზის „ოქროს ბურთის“ მფლობელის საკულტო გამოსახულება, როდესაც ის „სანტიაგო ბერნაბეუს“ სტადიონზე გულშემატკივრებისთვის „ბარსას“ მაისურს მაღლა წევდა. ბანერი ასევე მოიცავდა QR კოდს, რომელიც საშუალებას აძლევდა მხარდამჭერებს, ყოფილ კაპიტანს სიყვარულისა და მხარდაჭერის ვიდეო შეტყობინებები გაეგზავნათ. მიზანი იყო, რომ მესის უშუალოდ მიეღო ბარსელონას მოსახლეობის სიყვარული, რაც შეახსენებდა მას, რომ ის არ არის დავიწყებული და კვლავ მოუთმენლად ელოდებიან. მესის გამოსახულებით ბანერის ირგვლივ ატეხილი რეაქციის შემდეგ, სირიამ ბარსელონაში, „Moviment 42“-ის საარჩევნო შტაბი წარადგინა. „სპოტიფაი კამპ ნოუდან“ სულ რამდენიმე მეტრში, ოთახში, რომელსაც „მესის ოთახი“ უწოდა, სირიამ ბანერის ინიციატივა არგენტინელი ლეგენდისადმი მიძღვნილ ხარკად აღწერა. „ჩვენ სწორად ვაკეთებთ საქმეს. ამას გეტყვით. ეს არის ხარკი. ხარკი, რომელიც მან არ მიიღო კლუბიდან გაძევებისას და რომელიც მას ეკუთვნის. ვიმედოვნებთ, რომ ამის ღირსნი ვიქნებით“, – განაცხადა სირიამ. „ვიმედოვნებთ, რომ წევრებისა და გულშემატკივრების მიერ მთელი მსოფლიოდან გამოგზავნილი ყველა ვიდეო აჩვენებს მას, რომ არსებობს არა მხოლოდ ერთი ხმა. ყოველ ჯერზე, როდესაც წევრებს ვხვდებით, ისინი გვეუბნებიან, რომ ყველაფერი უნდა გავაკეთოთ ლიონელ მესის დასაბრუნებლად.“ მან განაგრძო: „2021 წლიდან ჩვენ ვამბობდით, რომ კლუბის ისტორიაში ერთ-ერთი უდიდესი სტრატეგიული შეცდომა იყო ლიონელ მესის გაძევება. და 2021 წლიდან ვამბობთ ლიონელ მესის დაბრუნების აუცილებლობაზე. ის გვჭირდება. ის ფუნდამენტურია „ბარსას“ აწმყოსა და მომავლისთვის.“ „ეს ხარკი მოდის ვნებიდან, ემოციიდან და იმ რწმენიდან, რომ ჩვენ სწორი ადამიანები ვართ. წევრების უმრავლესობას სურს დაიბრუნოს ის აღფრთოვანება, რაც ისტორიაში საუკეთესო ფეხბურთელის სახლში დაბრუნებას მოჰყვება, იქ, საიდანაც მას არასოდეს უნდა წასულიყო“, – დაამატა სირიამ. თუმცა, სირიამ ასევე ხაზგასმით აღნიშნა, რომ მესი მოთამაშედ მხოლოდ იმ შემთხვევაში დაბრუნდება, თუკი ამას სპორტული დეპარტამენტი დაამტკიცებს. „მარკ სირიას არ შეუძლია და არც უნდა გადაწყვიტოს ფეხბურთელების დამატება ან გაშვება; ეს პროფესიონალი სპორტული დირექტორის პასუხისმგებლობაა“, – აღნიშნა მან. ხუან ლაპორტას მიმართ კრიტიკის ისრები გაუშვა, რომელიც ცოტა ხნის წინ პრეზიდენტობიდან გადადგა არჩევნებში მონაწილეობის მისაღებად, სირიამ დაამატა: „ერთ-ერთი მათგანი საკუთარ სახეს აყენებს წინ, ჩვენ კი ფეხბურთის ისტორიაში საუკეთესო მოთამაშეს.“ რაც შეეხება ყოფილი პრეზიდენტის კომენტარებს გამოუცდელი კანდიდატების შესახებ, რომლებმაც შესაძლოა კლუბი გაანადგურონ, სირიამ განაცხადა: „როდესაც ის ლაპარაკობს გამოუცდელ ადამიანებზე, რომლებმაც შეიძლება კლუბი გაანადგურონ… განადგურება? ჩვენ უკვე განადგურებულები ვართ, ჩვენ უკვე განადგურებულები ვართ! 850 მილიონი გაყიდული, 230 მილიონი ზარალი, ფინანსური ფეირ-ფლეის შეუსრულებლობა და ვალის რეფინანსირება.“ „2003 წელს ხალხიც გამოცდილების გარეშე მოვიდა. თუ მაგიდაზე დავდებთ, ვის აქვს მეტი გამოცდილება კლუბის გამოსასწორებლად, ჩვენ უდავოდ გავიმარჯვებთ“, – განაცხადა მან. წყარო: SPORT