მადრიდის „რეალი“ უეფა-ს ჩემპიონთა ლიგის პლეი-ოფის პირველ მატჩს სტუმრად, ლისაბონში, „ესტადიო და ლუშზე“ „ბენფიკასთან“ გამართავს. მატჩის დაწყებამდე ერთ საათზე მეტით ადრე, მადრიდის „რეალის“ მთავარმა მწვრთნელმა ალვარო არბელოამ დაასახელა სასტარტო შემადგენლობა, რომელიც ჟოზე მოურინიოს გუნდის წინააღმდეგ ითამაშებს. მთავარი სიახლე ისაა, რომ კილიან მბაპე სასტარტო შემადგენლობას დაუბრუნდა მას შემდეგ, რაც ლა ლიგაში, გასულ უქმეებზე „რეალ სოსიედადის“ წინააღმდეგ არცერთი წუთი არ უთამაშია. ფრანგი სუპერვარსკვლავი, რომელსაც მუხლზე მცირე დისკომფორტი ისევ აწუხებს, „რეალის“ ორშუბა შეტევაში ვინისიუს ჟუნიორს შეუწყვილდება. ამასობაში, არბელოამ კიდევ ერთხელ აირჩია ოთხკაციანი ნახევარდაცვის სქემა, რომელშიც შედიან არდა გიულერი, ფედერიკო ვალვერდე, აურელიენ ჩუამენი და ედუარდო კამავინგა. ეს ტაქტიკა ბოლო მატჩებში წარმატებით მუშაობდა. დაცვაში, ტრენტ ალექსანდერ-არნოლდი მარჯვენა მცველის პოზიციაზე კვლავ სასტარტოშია „რეალ სოსიედადის“ წინააღმდეგ შთამბეჭდავი თამაშის შემდეგ. ალვარო კარერასი მარცხენა მცველად განაგრძობს, ხოლო ცენტრალურ დაცვაში ანტონიო რუდიგერი და დინ ჰუისენი შეუწყვილდებიან ერთმანეთს. ტიბო კურტუა, როგორც ყოველთვის, კარს დაიცავს. აღსანიშნავია, რომ კარერასი, ჩუამენი და ჰუისენი ერთი ყვითელი ბარათის მიღების შემთხვევაში ერთმატჩიან დისკვალიფიკაციას გამოტოვებენ, რამაც შესაძლოა, მათ შემდეგ კვირას „ბერნაბეუზე“ გასამართი საპასუხო მატჩი გამოატოვებინოს.