ნუნო სამერვილის ფორმაზე: ის თავდაჯერებულობითაა სავსე

კრისენსიო სამერვილის წინა ექვსი გოლი 56 საკლუბო მატჩში იყო გატანილი ყველა ტურნირის მასშტაბით – ხუთი „ლიდსის“ მაისურით და ერთი „ვესტ ჰემისთვის“. მისი ფორმა საუკეთესო დროს გამოჩნდა, რადგან „ჩაქუჩები“ პრემიერ ლიგაში მესამე ადგილზე არიან ბოლოდან და სამი ქულით ჩამორჩებიან მე-17 ადგილზე მყოფ „ნოტინგემ ფორესტს“. „ვესტ ჰემი“ შაბათს „ბორნმუთს“ უმასპინძლებს, 28 თებერვალს კი „ლივერპულს“ ესტუმრება. სამერვილმა ის ფორმა დაიბრუნა, რომელმაც „ვესტ ჰემი“ მისთვის დიდი თანხის გადახდაში დაარწმუნა. „ის კარგ ფორმაშია, სავსეა თავდაჯერებულობით, ყველაფერი, რასაც აკეთებს, კარგად გამოსდის, ამიტომ ეს უნდა გამოვიყენოთ“, – განაცხადა მწვრთნელმა ნუნო ესპირიტო სანტომ. „ეს თავდაჯერებულობაა, ყველა ფეხბურთელმა იცის, როგორ არის ეს. ყველაფერი თავდაჯერებულობაზეა დამოკიდებული. ის კარგ მომენტშია და გუნდისთვის მუშაობს. პრემიერ ლიგაში ვერ ითამაშებ, თუ საკუთარი თავის რწმენა არ გაქვს“. ნუნომ არ აღიარა, რომ სამერვილი მოედანზე 83-ე წუთზე ადრე უნდა შეეყვანა, მაგრამ მიიჩნია, რომ 10 ცვლილების გაკეთება მისი გუნდისთვის სწორი გადაწყვეტილება იყო. „ზოგჯერ მართალი ხარ, ზოგჯერ კი არა, მაგრამ ეს არის ის, რაც გუნდს სჭირდება. ყველაფერზე მნიშვნელოვანია იმ ფეხბურთელების პატივისცემა, ვინც თამაში დაიწყო“, – დაამატა მან. „ვიცოდით, რომ „ბარტონი“ ძლიერად დაიწყებდა, ყოველი აუტი და ყოველი სტანდარტული სიტუაცია მაქსიმალურ ყურადღებას მოითხოვს და ფეხბურთელებმა ამ ასპექტში კარგად ითამაშეს. დამატებით დროში ზოგიერთ ფეხბურთელს დაღლილობა ეტყობოდა და სამერვილმა გამოგვაცოცხლა. როდესაც ის ერთ-ერთზეა და თავისუფალ სივრცეში, თითქმის შეუჩერებელია.“