„ბარსელონას“ ფეხბურთელმა პაუ კუბარსიმ ისაუბრა „ბარსელონაში“ ცხოვრებასა და იმაზე, თუ როგორ შეარქვეს მას თანაგუნდელებმა კარიერის ადრეულ ეტაპზე „მაკდონალდსის მიმტანი“. მცველმა ეს მეტსახელი მას შემდეგ მიიღო, რაც მძიმე სახის ტრავმის გამო, რომელმაც ნაკერები მოითხოვა, მატჩების დროს დამცავი ნიღბის ტარება მოუწია. თუმცა, თანაგუნდელებმა მას დიდი თანაგრძნობა არ გამოუცხადეს და ახალგაზრდა ფეხბურთელზე ხუმრობას ვერ მოერიდნენ. „კიდევ ერთი დასამახსოვრებელი მომენტი „ცრვენა ზვეზდასთან“ მატჩში მოხდა. ორთაბრძოლის დროს თავი დავხარე, მოწინააღმდეგე გუნდის ფეხბურთელმა ფეხი ასწია და სახეში მომხვდა. დავინახე, რომ სისხლდენა დაეწყო, თანაგუნდელები შეშინდნენ და ექიმს დაუძახეს“, – განუცხადა მან L’Equipe-ს. „ტაიმის ბოლოს მან მითხრა, რომ ნაკერები მჭირდებოდა. თავიდან ვთხოვე, სელფი გადამეღო, რომ დედაჩემისთვის გამეგზავნა და მეთქვა, რომ კარგად ვიყავი, მაგრამ ასევე სუვენირი რომ მქონოდა.“ „რამდენიმე დღის შემდეგ „რეალ სოსიედადის“ წინააღმდეგ რომ მეთამაშა, დამცავი ჩაფხუტი უნდა მცმოდა, რაც მაკდონალდსის თანამშრომელს მაგვარებდა. ჩემმა თანაგუნდელებმა „მაკდონალდსის მიმტანი“ შემარქვეს!“ ეს არ არის ერთადერთი მეტსახელი, რომელიც მას „ბარსელონაში“ შეარქვეს. ჟოაო კანსელომ მცველს „ფრანც ბეკენბაუერ კუბარსი“ უწოდა „ხეტაფესთან“ გამორჩეული თამაშის შემდეგ.