ვიტორ პერეირას პირველი დავალება „ნოტინგემ ფორესტის“ თავკაცის რანგში ყოფილი დამსაქმებლის წინააღმდეგ იქნება, რადგან მისი გუნდი თურქულ გრანდ „ფენერბაჰჩეს“ ევროპა ლიგის პლეი-ოფში დაუპირისპირდება. პერეირა, რომელმაც 2015-დან 2021 წლამდე „ფენერბაჰჩეში“ ორჯერ იმუშავა, „ფორესტის“ სეზონის მეოთხე მწვრთნელად კვირას, შონ დაიჩის გათავისუფლების შემდეგ, დაინიშნა. მან მემკვიდრეობით მიიღო კლუბი, რომელიც დაქვეითებისთვის მძიმე ბრძოლაშია ჩართული და „ფორესტის“ ევროპული კამპანია შესაძლოა ხელისშემშლელი აღმოჩნდეს მათი უმაღლეს ლიგაში დარჩენის იმედებისთვის, რადგან მატჩების სიმრავლე გუნდს დამატებით დატვირთვას აკისრებს. თუმცა, იმ ფონზე, რომ „ფორესტის“ ევროპა ლიგის ამბიციები სეზონში დარჩენილი ერთადერთი ნათელი წერტილია, პერეირა შეეცდება თავისი ყოფილი კლუბი სტამბოლში დაამარცხოს და მერვედფინალში ერთი ფეხით შეაბიჯოს. გთავაზობთ ყველა იმ დეტალს, რაც უნდა იცოდეთ. „ფენერბაჰჩეს“ და „ნოტინგემ ფორესტის“ დაპირისპირება თბილისის დროით 21:45 საათზე (GMT 17:45) სტამბოლში, „შუქრუ სარაჩოღლუს“ სტადიონზე დაიწყება. გაერთიანებულ სამეფოში მატჩის ხილვა TNT Sports 3-ზე იქნება შესაძლებელი, პირდაპირი ეთერი 17:00 საათიდან დაიწყება. „ფენერბაჰჩეს“ დაცვის ხაზის მოთამაშეები ლევენტ მერჯანი და არჩი ბრაუნი ტრავმების გამო კვლავ ვერ ითამაშებენ, ხოლო ედსონ ალვარესის მონაწილეობა კოჭის პრობლემების გამო საეჭვოა. იანვარში გადმოყვანილი ნ’გოლო კანტე სავარაუდოდ ძირითად შემადგენლობაში იქნება. „ფორესტში“, თავის მხრივ, სისტემის შეცვლა იგეგმება პერეირას ხელმძღვანელობით, რომელსაც 3-4-2-1 სქემით თამაში მოსწონს. გუნდს კვლავ არ ეყოლება მეკარეები მაძ სელსი და ჯონ ვიქტორი, რაც იმას ნიშნავს, რომ კარში სტეფან ორტეგა დადგება. კრის ვუდი და ვილი ბოლი ვერ ითამაშებენ, მაგრამ მურილიო, შესაძლოა, ტრავმის შემდეგ მოედანს დაუბრუნდეს. „ფენერბაჰჩეს“ სავარაუდო შემადგენლობა: ედერსონი; მულდური, შკრინიარი, ოსტერვოლდე, სემედუ; გენდუზი, კანტე; მუსაბა, ასენსიო, ნენე; ტალისკა. „ნოტინგემ ფორესტის“ სავარაუდო შემადგენლობა: ორტეგა; კუნია, მილენკოვიჩი, მურილიო; აინა, სანგარე, ანდერსონი, უილიამსი; გიბს-უაიტი, მაკეითი; ჟესუსი.