„სელტიკი“ და „შტუტგარტი“ ევროპულ ბატალიებში: საინტერესო სტატისტიკა

უეფა-ს ევროპა ლიგის მიმდინარე სეზონში სტანდარტული მდგომარეობებიდან „სელტიკზე“ (8) მეტი გოლი (9) მხოლოდ „მიდტიულანდს“ აქვს გატანილი – შოტლანდიური კლუბის ბოლო ხუთი გოლიდან ოთხი სწორედ ამ მეთოდით (სამი კუთხური, ერთი პენალტი) იქნა გატანილი. ეს „შტუტგარტისთვის“ პირველი მთავარი ევროპული ნოკაუტ-რაუნდის მატჩია 2012-13 წლების სეზონის შემდეგ, როდესაც გერმანული კლუბი უეფა-ს ევროპა ლიგის მერვედფინალში „ლაციოსთან“ საერთო ანგარიშით 5:1 დამარცხდა. საერთო ჯამში, „შტუტგარტმა“ ბოლო 11 ნოკაუტ მატჩიდან მხოლოდ ერთი მოიგო (3 ფრე, 7 წაგება). „სელტიკმა“ მთავარი ევროპული ტურნირების ნოკაუტ ეტაპზე ბოლო 10 საშინაო მატჩიდან მხოლოდ ერთი მოიგო (3 ფრე, 6 წაგება). უკანასკნელი ოთხი შეხვედრა ზედიზედ წააგო და თითოეულში მინიმუმ ორ-ორი გოლი გაუშვა. 1964-დან 2007 წლამდე შოტლანდიურ გუნდებთან ხუთივე საგარეო ევროპული მატჩის წაგების შემდეგ, „შტუტგარტმა“ შოტლანდიაში ბოლო ვიზიტი 2009 წლის ნოემბერში მოიგო – 2:0 „რეინჯერსთან“ უეფა-ს ჩემპიონთა ლიგის ჯგუფურ ეტაპზე. „სელტიკი“ და „შტუტგარტი“ მთავარ ევროპულ ტურნირებზე მანამდე ორჯერ შეხვედრიან. 2002-03 წლების უეფა-ს თასის მერვედფინალში მარტინ ო'ნილის ხელმძღვანელობით შოტლანდიურმა კლუბმა საერთო ანგარიშით 5:4 გაიმარჯვა (სახლში 3:1, სტუმრად 2:3).