უეფა-ს ევროპა ლიგა, პლეი-ოფის რაუნდი, პირველი მატჩი ხუთშაბათი, 2026 წლის 19 თებერვალი სელტიკ პარკი, გლაზგო სელტიკი…1 (ნიგრენი 21’) შტუტგარტი…4 (ხანუსი 15’ და 28’, ლეველინგი 57’, ტომასი 90+2’) გლაზგოს „სელტიკს“ უმძიმესი ამოცანა ელის მომავალ კვირას გერმანიაში, უეფა-ს ევროპა ლიგის პლეი-ოფის განმეორებით მატჩში, მას შემდეგ, რაც გუშინ (ხუთშაბათს) საკუთარ მოედანზე 1:4 დამარცხდა. მატჩი ორივე გუნდმა აქტიურად დაიწყო, თუმცა მე-15 წუთზე ანგარიში სტუმრებმა გახსნეს. დენის უნდავმა ბილალ ელ ხანუსს გადააწოდა ბურთი, რომელმაც დაბალი, მარცხენა ფეხით დარტყმით „სელტიკის“ კარის ბადე შეარხია. მიუხედავად იმისა, რომ „ჰუპსის“ ფეხბურთელები შტუტგარტელის თამაშგარეს აპროტესტებდნენ, VAR-ის შემოწმების შემდეგ გოლი კანონიერად ჩაითვალა. თუმცა სტუმრების უპირატესობა მხოლოდ ექვს წუთს გაგრძელდა, რადგან „სელტიკმა“ ბენიამინ ნიგრენის გოლით წონასწორობა აღადგინა. შვედმა სეზონში მე-17 გოლი გაიტანა. „ჰუპსის“ ფეხბურთელმა გერმანული გუნდის დაცვის შეცდომით ისარგებლა, საჯარიმოში შეიჭრა, მეკარეს გვერდი აუარა და ბურთი კარში გადაგზავნა, რითაც მიმდინარე ევროპულ კამპანიაში მეოთხე გოლი მიითვალა და ანგარიში 1:1 გახადა. თუმცა ანგარიშში წონასწორობამ დიდხანს არ გასტანა, რადგან „შტუტგარტმა“ ისევ გაიტანა თამაშის ნახევარი საათის გასვლამდე. მარჯვენა ფლანგიდან მაღალმა ჩაწოდებამ ელ ხანუსი ექვსმეტრიანი მოედნის სიახლოვეს იპოვა, მან კი თავური დარტყმით კასპერ შმეიხელს აუღებელი დაურტყა და ბურთი კარში მოათავსა. ამ მეორე გოლმა „შტუტგარტს“ განახლებული თავდაჯერება შესძინა და მათ ბურთის კონტროლი დაიწყეს, რამდენიმე საგოლე მომენტი შექმნეს, თუმცა უშედეგოდ, „სელტიკს“ კი „შტუტგარტის“ დაცვის გარღვევა უჭირდა. შესვენების შემდეგ „სელტიკი“ მატჩში დაბრუნების გზებს ეძებდა და ჯულიან არაუხომ საკუთარი ნახევრიდან „შტუტგარტის“ საჯარიმო მოედნის კიდემდე სახიფათო რეიდი განახორციელა, რის შედეგადაც კუთხური მოიპოვა, თუმცა სტანდარტულმა სიტუაციამ შედეგი არ გამოიღო. „ჰუპსი“ კი დაისაჯა, როდესაც „შტუტგარტმა“ 57-ე წუთზე მესამე გოლი გაიტანა. დენის უნდავმა ისევ საგოლე პასი გააკეთა, ამჯერად ჯეიმი ლეველინგისთვის, რომელმაც საჯარიმოს კიდიდან ზუსტი დარტყმით გამოიჩინა თავი. მხოლოდ ორ წუთში გერმანულმა გუნდმა იფიქრა, რომ ანგარიში 4:1 გახადა, როდესაც ერმედინ დემიროვიჩმა შესანიშნავი კომბინაცია დაასრულა, მაგრამ VAR-ის შემოწმების შემდეგ გოლი თამაშგარეს გამო უარი ეთქვა. საპირისპირო კარზე ბენიამინ ნიგრენის დარტყმა საჯარიმოს შიგნიდან ალექსანდერ ნუბელმა მოიგერია, ხოლო სებასტიან ტუნექტის ორი დარტყმა საჯარიმოს კიდიდან მიზანს ასცდა. მატჩის დასრულებამდე 10 წუთით ადრე კასპერ შმეიხელმა ტიაგო ტომასის დარტყმა მოიგერია, ხოლო მარსელო სარაჩის ჩაწოდებამ კინაღამ მოატყუა მეკარე, მაგრამ ბურთი კარს ზემოთ გადაცდა. თუმცა „შტუტგარტი“ ყოველ შეტევაზე სახიფათო იყო და დამატებულ დროში მეოთხე გოლიც გაიტანა, როდესაც შეცვლაზე შესულმა ტიაგო ტომასმა საჯარიმოში შეიჭრა, ბურთი შმეიხელზე გადააგდო და კარში მოათავსა, რითაც ანგარიში 4:1 გახადა.