შოტლანდიის ნაკრებს უელსთან „ექვსი ერის“ მატჩის წინ სამმაგი დანაკლისი აქვს - ჯემი რიჩი, ჯეკ დემპსი და ჯემი დობი კარდიფში ვერ გაემგზავრებიან. ეს ტრიო საკლუბო გუნდებს დაუბრუნდა მას შემდეგ, რაც მიურეიფილდზე, ინგლისთან „კალკუტას თასის“ გამარჯვებაში ტრავმები მიიღეს. ვარაუდობენ, რომ ისინი ტურნირის დარჩენილ ნაწილს გამოტოვებენ. ფრანგულმა კლუბმა „პერპინიანმა“ განაცხადა, რომ რიჩის წვივის ძვლის მოტეხილობის გამო ორი თვე გაუცდება, მთავარმა მწვრთნელმა გრეგორ ტაუნსენდმა კი ედინბურგში ინგლისთან გამარჯვების შემდეგ აღნიშნა, რომ დემპსიმ ბიცეფსის ტრავმა მიიღო. ამ წყვილის არყოფნა ტაუნსენდისთვის მესამე ხაზის გადახალისებას გამოიწვევს. დიდი ალბათობით, სასტარტო შემადგენლობაში მეთ ფაგერსონი იქნება, რომელმაც ინგლისთან მატჩში სათადარიგოთა სკამიდან კარგად ითამაშა. მრავალმხრივ გრეგორ ბრაუნს შესაძლოა მეორე ხაზიდან უკან გადაინაცვლოს, ახალგაზრდა ედინბურგელმა ფლანკერმა ფრედი დუგლასმა კი ამ სეზონში კარგი ფორმა აჩვენა. დობის მხრის ტრავმა „კალკუტას თასის“ დაპირისპირების ბოლო წუთებში მოხდა და ეს დიდი დარტყმაა იმ მოთამაშისთვის, რომელმაც მარცხენა ფრთაზე თავისი შანსი ხელიდან არ გაუშვა. დიდი ალბათობით, სასტარტო შემადგენლობას დაუბრუნდება დარსი გრემი, დუჰან ვან დერ მერვეც შესაძლოა მოხვდეს განაცხადში. ტაუნსენდმა ინგლისთან თამაშის შემდეგ აღნიშნა, რომ უელსთან მესამე ტურის მატჩისთვის ცვლილებები შესაძლოა აუცილებელი გახდეს, რადგან „ექვსი ერის“ განრიგში ცვლილებებმა პირველი დასვენების კვირა გააუქმა და გუნდებს სამი ტესტ-მატჩის ზედიზედ ჩატარება მოუწევთ. „ჩვენ ვიცოდით, რომ ამ სამ მატჩს ასე მივუდგებოდით“, - განაცხადა ტაუნსენდმა. მისი გუნდი ამ კვირაში ესპანეთში ვარჯიშობს, სანამ კარდიფში გაემგზავრება. „ჩვენ გვყავს ძლიერი გუნდი. გასულ კვირას გვქონდა A გუნდის მატჩი [იტალიის XV-ის წინააღმდეგ]. მორაგბეებმა ბევრი რაგბი ითამაშეს. სხვა მოთამაშეები, რომლებიც არ მონაწილეობდნენ A გუნდის თამაშში, ჩვენთან ერთად ვარჯიშობდნენ. დარწმუნებული ვარ, შემდეგ შაბათ-კვირას განსხვავებული გუნდი იქნება.“