ყველა ვარსკვლავის უიქენდის სამქულიანების კონკურსი, როგორც წესი, სახალისო სანახაობაა და წლევანდელიც არ იყო გამონაკლისი. ღონისძიებაზე ვირტუოზული სროლები აჩვენეს დევინ ბუკერმა და დემიან ლილარდმა. საბოლოოდ, ლილარდმა გაიმარჯვა ბუკერზე, მიუხედავად იმისა, რომ გასულ სეზონში მიღებული აქილევსის ტრავმის გამო, მიმდინარე სეზონში არ უთამაშია. კონკურსი დრამატული და სანახაობრივი იყო. ერთადერთი რაც აკლდა, იყო ის ადამიანი, რომელსაც საყოველთაოდ ყველა დროის საუკეთესო მსროლელად მიიჩნევენ – სტეფ კარი. კარის კონკურსი უკვე ორჯერ აქვს მოგებული (2015 და 2021 წლებში), მაგრამ წელს მონაწილეობა არ მიუღია. დანარჩენ მონაწილეებს მომავალ წელს ასე აღარ გაუმართლებთ, რადგან კარი დაჰპირდა, რომ 2027 წელს კონკურსში დაბრუნდება და მეგობრებსაც მოიყვანს. „ასი პროცენტით“, – განაცხადა კარიმ თავის მონაწილეობაზე. „უკვე დავგეგმე. რამდენიმე ადამიანს მოვიყვანთ. მე, დეიმი [დემიან ლილარდი], ვეცდები, კლეი [ტომპსონი] და დევი [დევინ ბუკერიც] წამოვიყვანო.“ თავისი ორი მოგებით, კარის კიდევ ერთი გამარჯვება სჭირდება კონკურსში, რათა ლილარდთან, ლარი ბერდთან და კრეიგ ჰოჯესთან ერთად ყველა დროის ყველაზე მეტი გამარჯვების რეკორდი გაიმეოროს. ამ სამივე კალათბურთელმა კონკურსი სამ-სამჯერ მოიგო. კარის მონაწილეობა ღონისძიებას მაშინვე აუცილებელ სანახაობად აქცევს. არავის სურს ხელიდან გაუშვას შესაძლებლობა, ნახოს ოსტატი თავის საქმეში.