იურგენ კლოპის აგენტმა განაცხადა, რომ „ლივერპულიდან“ მისი წასვლის შემდეგ, გერმანელი მწვრთნელის მიმართ ინტერესი გამოხატეს როგორც „მანჩესტერ იუნაიტედმა“, ასევე „ჩელსიმ“. კლოპის წარმომადგენელმა, მარკ კოსიკემ, ასევე აღნიშნა, რომ 58 წლის სპეციალისტს 2023-24 წლების სეზონის ბოლოს „ენფილდის“ დატოვების შემდეგ, ინგლისის ეროვნული ნაკრების თავკაცობაც შეეძლო. „პრეს ასოციაციის“ ინფორმაციით, როგორც „იუნაიტედი“, ასევე „ჩელსი“ კატეგორიულად უარყოფენ კლოპთან კონტაქტს, იქნება ეს პირდაპირი თუ აგენტის მეშვეობით. „ტრანსფერმარკტთან“ საუბარში კოსიკემ განაცხადა: „„ჩელსიც“ და „მანჩესტერ იუნაიტედიც“ დაინტერესდნენ, თუმცა იურგენმა მკაფიოდ აღნიშნა, რომ ის ინგლისში არცერთ სხვა კლუბს არ გაწვრთნიდა. ეს მოთხოვნები მუდმივად შემოდის.“ მისი თქმით, კლოპი ამჟამად კმაყოფილია „რედ ბულში“ გლობალური ფეხბურთის ხელმძღვანელის ახალი როლით, მას შემდეგ რაც ცხრა წელი „ლივერპულში“ გაატარა, მანამდე კი „მაინცსა“ და „დორტმუნდის ბორუსიაში“ იმუშავა. კოსიკემ მომავალში კლოპის სამწვრთნელო საქმიანობაში შესაძლო დაბრუნებაზეც მიანიშნა: „შესაძლოა, ერთ მომენტში თქვას, რომ ისევ სჭირდება გასახდელის სუნი. მაგრამ ამჟამად ის ძალიან, ძალიან ბედნიერია თავის ამპლუაში.“ მან ასევე ხაზი გაუსვა კლოპის სიამაყეს მისი კარიერული გზით: „ის უაღრესად კმაყოფილია იმით, რაც მიაღწია. და მაინც მშვენიერია ისტორიაში შეხვიდე, როგორც ერთ-ერთი იმ მცირერიცხოვან მწვრთნელთაგანი, რომელიც მხოლოდ სამ კლუბში მუშაობდა და არასდროს გაათავისუფლეს.“ აგენტმა ასევე განაცხადა, რომ კლოპი ეროვნული ნაკრებებისთვისაც სამიზნე იყო. „„რედ ბულში“ გადასვლამდე იურგენს შეეძლო აშშ-ის ან ინგლისის ნაკრები გაეწვრთნა. ალბათ გერმანიაც, იულიან ნაგელსმანი იქ რომ არ ყოფილიყო“, – თქვა კოსიკემ. მან დააკონკრეტა, რომ შეერთებულმა შტატებმა კლოპს მიმართა 2024 წლის სექტემბერში მაურისიო პოჩეტინოს დანიშვნამდე, ხოლო ფეხბურთის ასოციაციამ 2025 წლის იანვარში თომას ტუხელი გარეტ საუთგეიტის მემკვიდრედ დაასახელა. ტუხელმა ინგლისის ნაკრებთან გასულ კვირას ახალი კონტრაქტი გააფორმა, რომელიც ევრო 2028-მდე გაგრძელდება. ამ განცხადებებთან დაკავშირებით კომენტარისთვის ინგლისის ფეხბურთის ასოციაციას მიმართეს.