ბუნდესლიგის კლუბ „რბ ლაიპციგის“ განცხადებით, მეკარე პეტერ გულაჩი მუხლის ტრავმის გამო დაახლოებით ექვსი კვირით ვერ ითამაშებს. კლუბმა ორშაბათს განაცხადა, რომ „პეტერ გულაჩიმ „ვოლფსბურგთან“ მატჩის დროს მარცხენა მუხლის მედიალური გირჭოვანი იოგის ნაწილობრივი გაწყვეტა მიიღო და სავარაუდოდ, მარტის ბოლომდე მოედანს ვერ დაუბრუნდება“. განცხადებაში, რომელიც X-ზე გავრცელდა, ასევე აღნიშნულია, რომ ოპერაცია არ არის საჭირო. გულაჩიმ ტრავმა კვირას „ვოლფსბურგთან“ ფრედ დასრულებული (2:2) მატჩის პირველ ტაიმში მიიღო და ის სათადარიგო მეკარე მარტენ ვანდევოორდტმა შეცვალა. „დიაგნოზი მწარეა, მაგრამ ჩვენ ვიცნობთ პიტს, როგორც ნამდვილ პროფესიონალს დიდი მენტალიტეტით. ის ყველაფერს გააკეთებს, რომ მალე და უფრო ძლიერი დაბრუნდეს“, – განაცხადა „ლაიპციგის“ მმართველმა დირექტორმა მარსელ შეფერმა. გულაჩიმ გასულ კვირას კონტრაქტი ერთი წლით გაახანგრძლივა. dpa-ს წყაროების თანახმად, ის მომავალ სეზონში მეორე ნომერი გახდება და მხარს დაუჭერს დაგეგმილ ახალ პირველ მეკარეს, ვანდევოორდტს. „ლაიპციგი“ ბუნდესლიგაში მეხუთე ადგილზეა და შემდეგ მატჩს მეორეადგილოსან „დორტმუნდის ბორუსიასთან“ გამართავს.