უეფამ განცხადება გაავრცელა მას შემდეგ, რაც ვინისიუს ჟუნიორმა ბენფიკას ფეხბურთელი, ჯანლუკა პრესტიანი, სამშაბათს (17 რიცხვში) ჩემპიონთა ლიგის მატჩის დროს მის მიმართ რასისტული შეურაცხყოფის მიყენებაში დაადანაშაულა. ბრაზილიელმა ფეხბურთელმა ლისაბონში გამართული პლეი-ოფის პირველი ეტაპის შეხვედრაში „რეალის“ გამარჯვების ერთადერთი გოლი გაიტანა, თუმცა აღნიშვნის გამო მალევე ყვითელი ბარათი მიიღო. როდესაც გუნდები თამაშის განახლებისთვის ემზადებოდნენ, ვინი ჟუნიორი მსაჯთან მივარდა და განაცხადა, რომ ის ჯანლუკა პრესტიანის მხრიდან რასისტული შეურაცხყოფის სამიზნე გახდა, რომელსაც პირი მაისურით ჰქონდა დაფარული. მსაჯმა ფრანსუა ლეტექსიემ ანტირასისტული პროტოკოლი გაააქტიურა და თამაში 10 წუთით შეჩერდა. კილიან მბაპემ ვინი ჟუნიორის ნათქვამი დაადასტურა და განაცხადა, რომ პრესტიანისგან სიტყვა "მაიმუნი" ხუთჯერ გაიგონა. არგენტინელმა ფეხბურთელმა, თავის მხრივ, მსგავსი ენის გამოყენება უარყო და თქვა, რომ ის არასწორად გაიგეს. უეფამ ამის შემდეგ უპასუხა და დაადასტურა, რომ სამშაბათის მატჩის ოქმების განხილვა მიმდინარეობს. „გასულ ღამეს ჩატარებული მატჩების ოფიციალური ოქმები ამჟამად განიხილება“, - განაცხადა უეფამ. „სადაც პრობლემები დაფიქსირდება, იხსნება საქმე და თუ ისინი გამოიწვევს დისციპლინური სანქციების დაწესებას, ისინი გამოცხადდება უეფას სადისციპლინო ვებგვერდზე. ამ ეტაპზე, ჩვენ არ გვაქვს დამატებითი ინფორმაცია ან კომენტარი ამ საკითხთან დაკავშირებით.“