ვიკარიო „ინტერში“ გადასვლაზე სრულ მზაობას გამოთქვამს – ფაბრიციო რომანო

სატრანსფერო ექსპერტი ფაბრიციო რომანო ადასტურებს, რომ „ტოტენჰემის“ მეკარე გულიელმო ვიკარიო სრულ მზაობას გამოთქვამს ზაფხულში მილანის „ინტერში“ გადასასვლელად. იტალიურმა მედიამ რამდენიმე კვირის წინ გაავრცელა ინფორმაცია, რომ ვიკარიო „ინტერის“ მთავარი სამიზნე იყო მომავალი სეზონისთვის და რომ იტალიის ნაკრების ფეხბურთელი ცდუნებული იყო „სან სიროზე“ გადასვლით. „ვიკარიო „ინტერის“ სიაში ძალიან მაღლა დგას“, – განაცხადა რომანომ YouTube-ზე. „ვიკარიოს მხრიდან „ინტერის“ მიმართ სრული ღიაობაა. ის სრულად მზადაა, შეუერთდეს „ინტერის“ პროექტს.“ აღსანიშნავია, რომ ვიკარიო „ინტერში“ გადასვლასთან ახლოს იყო 2023 წელსაც, როდესაც საბოლოოდ „ემპოლიდან“ ჩრდილოეთ ლონდონში, „ტოტენჰემში“ გადავიდა. „ინტერს“ ჯერ არ დაუწყია მოლაპარაკებები „ტოტენჰემთან“ შესაძლო საზაფხულო ტრანსფერის თაობაზე, მაგრამ სერია A-ს გრანდი აუცილებლად შეიძენს ახალ მეკარეს 2026-27 წლების სეზონისთვის, რადგან იან ზომერი კონტრაქტის დასრულების შემდეგ, ივნისში, „სან სიროს“ დატოვებს. ამ სეზონში ვიკარიომ „ტოტენჰემის“ მაისურით ჩატარებულ 36 მატჩში 13-ჯერ შეინახა კარი მშრალად და 48 გოლი გაუშვა. ის იტალიის ნაკრების მეორე მეკარეა, რომელსაც ხუთი საერთაშორისო მატჩი აქვს ჩატარებული.